EXPOSICIÓNS
JULIO DAS PASTORAS
Premio BDra GRÁFICA 2026 a toda unha carreira
O seu verdadeiro nome é Xulio Martínez Pérez, e naceu en 1956 en Santa Uxía de Ribeira (A Coruña). Tras trasladarse a Barcelona, dáse a coñecer en 1981 nas páxinas do prozine Zero, onde maduraría en compañía de artistas como Miguelanxo Prado ou Pasqual Ferry. En 1983 aparece o seu primeiro traballo profesional en El Víbora.
Pronto pasa a colaborar en revistas como Comix Internacional e Zona 84, con series como El futuro nuestro de cada día (con guión de Narcís Fradera) e Guerreros (con guións propios). Outras obras súas son Puzzle (1986), Canal 44 (1988) e Agurio (1990). Colaborou tamén en publicacións como El Jueves e no suplemento dominical do xornal El Mundo.
En 2002 lanza, con guión de Carlos Portela, o primeiro álbum da saga fantástica Los Heresiarcas para a editorial franco-suiza Les Humanoïdes Associés, publicada en numerosos países, incluídos os Estados Unidos. Paralelamente, traballa con Alejandro Jodorowsky en Castaka, un novo ciclo de La casta de los Metabarones.
FUNDACIÓN MOLDES - Do 25 de xuño ao 20 de xullo.
HOMS
Homs é o apelido co que o autor barcelonés Josep Homs asina os seus traballos. Formouse en debuxo na Escola Joso e iniciou axiña unha destacada traxectoria profesional no ámbito da banda deseñada.
Ao longo da súa carreira colaborou con importantes editoriais internacionais, tanto estadounidenses como europeas. Nos Estados Unidos traballou para Marvel, onde participou, xunto ao guionista Christopher Hinz, na serie Blade. Tamén realizou cómics do oeste para Marvel Westerns e debuxou a serie Red Sonja, con guións de Frank Cho e Doug Murray. Ademais, publicou traballos na revista Heavy Metal e nas antoloxías españolas Barcelona TM e Revolution Complex.
Entre as súas obras máis destacadas atópase El Ángelus, unha publicación recoñecida pola calidade do seu apartado gráfico. Posteriormente, en colaboración con Sylvain Runberg, desenvolveu a adaptación á banda deseñada da serie de novelas Millennium, de Stieg Larsson, publicada por Dupuis en seis partes.
Tamén foi o responsable gráfico da exitosa serie Shi, con guión de Zidrou. O seu traballo máis recente é El diablo y Coral, a súa primeira obra realizada como autor completo.
PAZO DA CULTURA de Pontevedra. Do 25 de xuño ao 20 de xullo.
Horario Luns Pechado. Martes a vernres: 18:00 a 21:00 - Sábados: 12 - 14 h Tardes: 18 a 21 h - Domingos: 12 - 14 h
KIM (PREMIO NACIONAL DE CÓMIC 2010)
Joaquim Aubert Puigarnau, máis coñecido como Kim, iniciou a súa formación en Belas Artes, aínda que non chegou a rematar os estudos. A súa traxectoria como historietista comezou na revista musical Vibraciones, para posteriormente colaborar noutras publicacións como Mata Ratos, El Víbora e Por Favor.
Desde as páxinas do semanario El Jueves creou a serie Martínez el Facha, unha sátira da extrema dereita española que se converteu nunha das obras máis representativas da historia da banda deseñada estatal.
A súa extensa carreira foi recoñecida con diversos galardóns, entre os que destacan o Gran Premio do Salón Internacional do Cómic de Barcelona e o XII Premio Internacional de Humor El Gat Perich. En 2010 recibiu, xunto ao guionista Antonio Altarriba, o Premio Nacional do Cómic pola obra El arte de volar, baseada na vida do pai de Altarriba e considerada unha destacada crónica da España do século XX.
En 2016 ambos os autores publicaron El ala rota, unha nova aproximación á historia da España do século pasado, nesta ocasión a través da experiencia da nai do guionista. Entre as súas obras máis destacadas figura tamén Nieve en los bolsillos, unha novela gráfica autobiográfica que combina o relato de iniciación cunha homenaxe á xeración que se viu obrigada a abandonar o seu fogar na procura dun futuro mellor.
A súa obra máis recente é El diario de la señorita Litgi.
CASA DAS CAMPÁS. Do 25 de xuño ao 20 de xullo.
Horario: 10:00 a 14:00 horas e 17:00 a 21:00
A VIDA TODA
de ÁNGEL DE LA CALLE - SEMPERE - RUIZ
A vida toda é unha novela gráfica con guión de Ángel de la Calle, debuxo de Jordi Sempere e cor de Anna Ruiz.
A obra narra a historia de Daniel, un psicanalista exiliado en París que descobre, a través do Banco Nacional de Datos Xenéticos da Arxentina, que é pai biolóxico. A partir desta revelación, a novela aborda cuestións relacionadas coa identidade, a memoria e as consecuencias persoais derivadas dos acontecementos históricos e políticos.
Coa combinación do guión de Ángel de la Calle, o traballo gráfico de Jordi Sempere máis a achega cromática de Anna Ruiz, La vida toda constrúe un relato centrado na procura das propias orixes e no impacto que o pasado pode exercer sobre a vida presente.
Foi publicada en galego por Retranca Editora e en castelán por Garbuix Books.
LICEO CASINO. Do 25 de xuño ao 30 de xuño.
Horario: 10:00 a 14:00 horas e 17:00 a 21:00
HOMENAXE A MARJANE SATRAPI
O GARAXE HERMETICO
Exposición do alumnado do Curso Profesional de Banda Deseñada en O Garaxe Hermético.
A exposición rende homenaxe a Marjane Satrapi, figura fundamental da banda deseñada contemporánea, falecida este mes de xuño aos 56 anos.
A súa obra, marcada pola memoria, a liberdade e a experiencia do exilio, constitúe unha referencia esencial para novas xeracións de autores e autoras.
Na homenaxe tamén se inclúe unha reflexión sobre as guerras que, por desgraza, seguen a poñer de plena actualidade os temas abordados na súa obra.
PAZO DA CULTURA de Pontevedra. Do 25 de xuño ao 20 de xullo.
Horario Luns Pechado. Martes a vernres: 18:00 a 21:00
Sábados: 12 - 14 h Tardes: 18 a 21 h - Domingos: 12 - 14 h